Pasar al contenido principal

O Galo protagonista da fin de semana

O Concello de Arteixo a través da Concellaría de Promoción e Desenvolvemento, celebra desde o ano 1992 o Feirón do Galo de Nadal, evento coñecido tamén coma Feira do Galo.

A data de celebración está fixada desde o seu nacemento para o sábado anterior á Noiteboa. Este ano coincide o próximo sábado, converténdose nunha das citas máis coñecidas da comarca coruñesa onde se mestura gastronomía, comercio e lecer.

Coma calquera outro sábado, os comerciantes e feirantes achéganse a Arteixo e ofrecen os seus singulares produtos, diferentes a calquera outro sábado de feira. Acoden cos galos que crían eles mesmos e proceden deste municipio pero tamén doutros limítrofes. Todos os exemplares entran nun concurso onde o xurado elixe os mellores e nun acto público entréganse diferentes premios en metálico.

Este ano continúase coas Xornadas de Tapeo no Nadal nas que participan oito establecementos hostaleiros e, en torno á Feira do Galo, ofrecen petiscos relacionados coas comidas típicas destas datas elaborándoas segundo o seu criterio e escollendo un nome en galego para cada petisco. Atoparemos, nesta ocasión, "delicias de polo"; "polvo galaico-astur"; "galo de nadal"; "galamouro"; "galo ao chocolate"; "mexilóns especiais"; "o poliño clip-clop" e "pastas de Habaziro". 

galo